Am y gwobrau

• Pennaeth y Flwyddyn

Mae’r wobr hon yn cael ei neilltuo ar gyfer pennaeth sydd wedi bod yn eu ysgol/coleg am o leiaf tair blynedd. Yn cael ei dyfarnu i unigolyn sy’n gallu dangos ei fod yn abl i ysbrydoli eraill. Pennaeth eithriadol sy’n arddangos y gallu i ennyn diddordeb yr ysgol/coleg yn y gymuned, a diddordeb y gymuned yn yr ysgol/coleg er mwyn gwneud gwahaniaeth i bob dysgwr. Hefyd, darparu tystiolaeth o gefnogi cydweithwyr mewn ysgolion/colegau eraill.

• Defnyddio'r Gymraeg mewn modd sy'n ysbrydoli

Mae’r wobr hon ar gyfer athrawon/darlithwyr neu staff eraill sydd wedi ysbrydoli dysgwyr a chydweithwyr yn eu hysgol/coleg i ddefnyddio a mwynhau’r Gymraeg. Gall enwebeion weithio mewn ysgolion cyfrwng Cymraeg, dwyieithog a Saesneg. Gallant ysbrydoli drwy’r broses ddysgu yn y dosbarth, drwy gydweithio â chydweithwyr a chyrff allanol neu drwy ddulliau arloesol eraill.   

• Athro Newydd Eithriadol

Mae’r wobr hon yn cael ei neilltuo ar gyfer athrawon sydd yn eu hail neu trydedd blwyddyn o addysgu mewn ysgol. Yn cael ei dyfarnu i unigolyn sy’n dangos brwdfrydedd a dulliau ardderchog yn y dosbarth i gefnogi dysgu’r disgyblion a sicrhau canlyniadau eithriadol. Gan ddangos rhinweddau arweinyddiaeth cynnar, mae wedi ymrwymo i’w ddatblygiad proffesiynol ei hun er lles dysgwyr. Mae’n dangos technegau cydweithredol a dymuniad i arloesi i hyrwyddo dysgu effeithiol.

• Athro’r Flwyddyn mewn Ysgol Gynradd

Yn cael ei dyfarnu i unigolyn sy’n arddangos rhinweddau athro eithriadol. Yn dangos tystiolaeth o ofal a chariad at y dysgwyr, a brwdfrydedd tuag at yr addysgu. Tystiolaeth o fod yn esiampl ardderchog i’r genhedlaeth iau, ymdrechu’n ddiorffwys i godi safonau a chael effaith gadarnhaol ar ddysgu’r disgyblion.

• Gwobr y dysgwyr ar gyfer Athro/Darlithydd Gorau

Mae'r wobr hon wedi'i chynllunio er mwyn i ddysgwr (neu grŵp o ddysgwyr) presennol, neu gyn-ddysgw(y)r, enwebu athro/darlithydd sydd wedi gwneud gwahaniaeth enfawr i'w fywyd/bywydau yn yr ysgol/coleg.

Athro/darlithydd sydd wedi'ch ysbrydoli i ddysgu, wedi cynnig cyngor a chymorth mewn perthynas â'ch llesiant ac wedi'ch cymell i wneud eich gorau. 

• Athro’r Flwyddyn mewn Ysgol Uwchradd

Yn cael ei dyfarnu i unigolyn sy’n arddangos rhinweddau athro eithriadol. Yn dangos tystiolaeth o ofal a chariad at y dysgwyr, a brwdfrydedd dros ei bwnc. Tystiolaeth o fod yn esiampl ardderchog i’r genhedlaeth iau, ymdrechu’n ddiorffwys i godi safonau a chael effaith gadarnhaol ar ddysgu’r disgyblion.

• Cynorthwyydd Cymorth Dysgu

Yn cael ei dyfarnu i’r unigolion sydd wedi darparu cymorth rhagorol ac wedi cael effaith eithriadol ar yr addysgu a'r dysgu sydd yn yr ysgol.

• Gwobr Betty Campbell MBE am hyrwyddo cyfraniadau a safbwyntiau cymunedau Du, Asiaidd ac Ethnig Leiafrifol

Dyfernir y wobr hon i unigolyn, tîm neu ysgol/coleg sydd wedi dangos ymwybyddiaeth ardderchog o bwysigrwydd addysg gynhwysol fel rhan o gymdeithas sy’n wynebu ac yn mynd i’r afael â hiliaeth, ac a all ddangos tystiolaeth o gyflawni canlyniadau clir.

• Darlithydd y Flwyddyn

Yn cael ei dyfarnu i unigolyn sy’n arddangos rhinweddau darlithydd coleg eithriadol. Yn dangos tystiolaeth o ofal a chariad at y dysgwyr, a brwdfrydedd dros ei bwnc. Tystiolaeth o fod yn esiampl ardderchog i’r genhedlaeth iau, ymdrechu’n ddiorffwys i godi safonau a chael effaith gadarnhaol ar ddysgu’r disgyblion.

• Ymgysylltiad Dysgwyr yn yr Ysgol/Coleg

Dyfernir y wobr hon i unigolyn, tîm neu ysgol/coleg sydd wedi dangos agwedd ardderchog i wella ymgysylltiad a phresenoldeb dysgwyr, ac a all ddangos tystiolaeth o gyflawni canlyniadau clir.  

Y ffordd rwyddaf o wneud enwebiad yw drwy ddefnyddio ein ffurflen ar-lein. Gallwch arbed eich gwaith a chyflwyno’r ffurflen pan fyddwch yn hapus â hi. Byddwch yn cael e-bost yn awtomatig i gadarnhau derbyn eich ffurflen ar ôl ichi ei chwblhau.

Os byddai well gennych gwblhau’r ffurflen enwebu all-lein, anfonwch e-bost at gwobrauaddygsu@llyw.cymru gyda’ch manylion cyswllt a’r categori perthnasol ar gyfer yr enwebai.

• Gall enwebeion gynnwys athrawon cymwysedig/darlithwyr a staff cymorth dysgwyr ysgolion/colegau.
• Mae pob athro llawn amser, rhan amser a pheripatetig, darlithwyr a chynorthwyydd addysgu yn gymwys i gael ei enwebu, gan gynnwys penaethiaid sy'n addysgu ac nad ydynt yn addysgu, prif swyddogion gweithredu ysgolion/colegau.
• Gall ffurflen gais gael ei llenwi a'i chyflwyno gan rieni/gofalwyr, dysgwyr, penaethiaid a phrif swyddogion gweithredu colegau.
• Ni chewch enwebu rhywun sydd wedi ymddeol neu a fydd yn ymddeol cyn diwedd mis Ebrill 2024 ar gyfer gwobr. 
• Ni all y Gwobrau dderbyn enwebiad ar gyfer rhywun sydd wedi marw nac ar gyfer ymarferwr sydd wedi ymddeol. 
• Ni chaiff unigolion enwebu eu hunain ar gyfer gwobr. 
• Caniateir i Wobrau Addysgu Proffesiynol Cymru wahardd unrhyw enwebai ar unrhyw adeg yn ôl ei ddisgresiwn ei hun.

• Teipiwch eich enwebiad ar ffurf dogfen Word yn gyntaf. Bydd hyn yn ei gwneud yn haws i’w wirio a’i newid cyn copïo a gludo’r gwaith i’ch ffurflen. Byddwch yn arbed amser a bydd yn eich galluogi i gyfleu eich neges yn fwy eglur.
• Os nad ydych yn adnabod y sawl yr ydych yn ei enwebu yn bersonol, rhowch cymaint o fanylion ag y gallwch, gan gynnwys manylion cyswllt, os yn bosibl. 
• Dewiswch y categori cywir. Meddyliwch am y math o weithgareddau a/neu’r rolau y mae’r enwebai wedi rhagori ynddynt. 
• Rhowch esiamplau da. Esboniwch bob tro sut y mae eich enwebai wedi llwyddo. Peidiwch â defnyddio haeriadau fel "Mae’r enwebai wedi gweithio’n galed gydol ei yrfa”; defnyddiwch dystiolaeth i esbonio beth mae’r enwebai wedi ei wneud.
• Cofiwch esbonio: pwy ydyn nhw, beth yn union y maen nhw wedi’i wneud, a pham eu bod yn haeddu Gwobr Addysgu Proffesiynol Cymru. 
• Peidiwch ag enwebu’r un person yn yr un categori fwy nag unwaith. Ni fydd nifer yr enwebiadau’n newid y canlyniad.

• 9 Ionawr 2024 - Dechrau’r cyfnod enwebu
• 2 Chwefror 2024 - Diwedd y cyfnod enwebu
• May 2024 - Cyhoeddi’r rhestr fer
• Gorffennaf 2024 - Seremoni Wobrwyo

Panel cenedlaethol o feirniaid sy’n dewis pwy sy’n cyrraedd y rhestr fer ar gyfer y 10 categori.

Cynrychiolwyr Gwobrau Addysgu Proffesiynol Cymru fydd y beirniaid, yn gweithio gyda chynrychiolwyr o'r consortia rhanbarthol i wneud yn siŵr bod pob enwebiad yn cael y sylw llawn. 

Rôl aelodau’r panel yw beirniadu a sgorio’r enwebeion yn unol â’r meini prawf y cytunwyd arnynt. Bydd Llywodraeth Cymru’n cydgysylltu’r broses ac yn sicrhau bod y paneli beirniadu’n gweithredu mewn ffordd deg.

Bydd y panel yn cyfarfod i drafod yr enwebeion a bydd y rhestrau byr yn cael eu cyhoeddi yn Mai 2024.

Drwy gyflwyno eich ffurflen enwebu rydych chi'n cydsynio i'n hysbysiad preifatrwydd.  Ceir dwy ffurflen sy'n cyfeirio at yr enwebai a'r enwebydd.